Бирлашган Миллатлар Ташкилоти (БМТ) Исроил армиясини Ғазо секторида 15 нафар тиббиёт ходимини ўлдирганликда айблади. Бу ҳақда The Guardian нашри хабар берди.
"БМТнинг гуманитар масалалар бўйича бошқармаси маълумотларига кўра, Фаластин Қизил Ярим Ой ва фуқаролик мудофааси ходимлари Рафаҳ шаҳрининг Тел-Султон ҳудудида уларнинг аниқ белгиланган автомобиллари Исроилнинг кучли ўқлари остида қолиб, ўққа тутилган ҳамкасбларини қутқариш вазифасини бажарган," - дейилади нашр хабарида.
Аниқланишича, ҳалок бўлган тиббиёт ходимлари кейинчалик Ғазо жанубидаги биродарлик қабрига дафн қилинган. Шу билан бирга, шифокорлардан бирининг жасади қўллари боғланган ҳолда топилган.
"Отишма 23 март куни, Исроил ҳужуми қайта бошланган куннинг эртасига Миср чегарасига яқин ҳудудда содир бўлган. Миссияда бўлган яна бир Қизил Ярим Ой ходими бедарак йўқолган деб ҳисобланмоқда," - дейилади газета хабарида.