Аввалроқ, 26 октябрь куни украиналик журналист Дмитрий Гордон исроиллик тадбиркор Леонид Невзлин билан суҳбатда Ўзбекистонда Эрон дронлари йиғилаётгани ҳақида айтганди.
Шундан сўнг, Мудофаа саноати давлат қўмитаси бу маълумотга муносабат билдирган ҳолда, Ўзбекистон Эрон билан ҳамкорликда қурол-яроғ ва ҳарбий техника ишлаб чиқармаган ва ишлаб чиқармаётганини таъкидлади.
Дмитрий Гордоннинг Ўзбекистонда Эрон дронлари ишлаб чиқарилиши ҳақидаги маълумоти ижтимоий тармоқлар фойдаланувчилари орасида кўплаб муҳокамаларга сабаб бўлди, шундан сўнг украиналик журналист ўз хатосини тан олди.
"Аслида мен Ўзбекистонни эмас, Тожикистонни назарда тутгандим. Фақат тилимдан Ўзбекистон сўзи чиқиб кетди. Ўзбекистонда чиндан ҳам дронлар ишлаб чиқариладиган завод борлиги маълум, аммо у Эрон билан қандайдир алоқадорлиги маълум эмас", - деди Дмитрий Гордон.
Украина журналисти ўзбек халқига узр сўраб, уларнинг меҳмондўстлиги ва самимийликларини қайд этди.
