Поиск
RUUZ

Происшествия

Тошкентда яна "103" ходимлари калтакланди

Ходимлар чақирув жойига етиб борганида беморлиги айтилган эркак ходимларга ташланган. Бир нафар ходим шифохонага олиб кетилган.

425views0replies
0

Ижтимоий тармоқ

Аввалроқ, ижтимоий тармоқларда пойтахтнинг Миробод туманида “Тез ёрдам” ходимлари калтаклангани ҳақида хабарлар тарқалди. Соғлиқни сақлаш вазирлиги мазкур ҳолат юзасидан маълумот берди.
Аниқланишича, кеча соат 18:50 атрофида Тошкент шаҳрининг Миробод тумани Темирйўлчилар кўчаси, 1/5-уй олдига 30 ёшли номаълум эркак кишида “Қон кетиш (хушсиз)” сабаби билан йўловчи фуқаро томонидан тез тиббий ёрдам хизматига чақирув келиб тушган.Шундан сўнг, шифокор М.З. ва фельдшер З.Ж.дан таркиб топган 397-сонли “103” бригадаси чақирув манзилига саноқли дақиқалар ичида етиб борган.
“Тез ёрдам” ходимлари манзилга келганида, кўчада беморлиги айтилган 22 ёшли фуқаро М.А. ноадекват ҳолатда ён-атрофдаги кишиларга тажовуз қилаётгани маълум бўлган. “103” кўчма бригадаси унга биринчи тиббий ёрдам кўрсатмоқчи бўлганда, фуқаро шифокорларга куч ишлатиб, ТТЁ автомашинасига ҳам жиддий зарар етказган.Шу пайт тез тиббий ёрдам ходимлари туман ички ишлар бўлимига мурожаат қилган.
Ҳуқуқни муҳофаза қилувчи орган ходимлари етиб келгунига қадар фуқаро М.А. “103” бригадаси ҳайдовчиси И.Ҳ.ни калтаклаб, унга жароҳат етказган.
Оқибатда жиддий тан жароҳати олган тез тиббий ёрдам машинаси ҳайдовчиси Республика шошилинч тиббий ёрдам илмий марказига бошқа бригада томонидан олиб борилган. Текширувлар натижасида у “Бош мия ёпиқ шикастланиши, бош мия чайқалиши, чап тизза соҳаси юмшоқ тўқималарининг лат ейиши” ташхиси билан нейрохирургия бўлимига ётқизилган.Шунингдек, кўчма бригада шифокори М.З. шифохонада амбулатор тартибда мутахассислар кўригидан ўтказилиб, унга “Қорин соҳаси юмшоқ тўқималари лат ейиши” ташхиси қўйилган.Соғлиқни сақлаш вазирлиги мазкур ҳолатни ўз назоратига олган.
Айни пайтда мазкур ҳолат юзасидан Миробод туман ички ишлар бўлими томонидан терговга қадар текширув ҳаракатлари олиб борилмоқда.
Эслатиб ўтамиз, аввалроқ Тошкентда беморга ёрдам кўрсатиш учун келган фельдшер аёл калтаклангани ҳақида хабар бергандик.
425views0replies
0

Комментарии