Аввалроқ Давлат активларини бошқариш агентлиги пойтахтнинг Миробод тумани Буюк Турон кўчаси, 41 ва 42-уйда жойлашган мулкий мажмуалар бино ва иншоотлар очиқ кимошди савдосига қўйилгани ҳақида хабар берган эдик.
"Шарқ" нашриёт-матбаа корхонаси (Буюк Турон кўчаси, 41-уй) ва Ўзбекистон Миллий ахборот агентлиги (Буюк Турон кўчаси, 42-уй) ушбу манзилда жойлашган.
21 сентябр куни Маданий мерос агентлиги Давлат активларини бошқариш агентлигига ушбу маданий мерос объекти ким ошди савдосидан олиб ташланиши ҳақида огоҳлантириш тақдим этди.
Маълум бўлишича, 1979-1983 йилларда қурилган ушбу бинолар Моддий маданий мерос объектлари миллий рўйхатига киритилган.
Маданий мерос агентлиги "Маданий мерос объектларини муҳофаза қилиш ва улардан фойдаланиш тўғрисида"ги қонуннинг 23-моддасига кўра, давлат мулки бўлган моддий маданий мерос объектлари миллийлаштирилиши ёки хусусийлаштирилиши мумкин эмаслигини эслатиб ўтди.
Шунингдек, "Давлат мулкини бошқариш тўғрисида"ги қонуннинг 19-моддаси учинчи бандига кўра, моддий маданий мерос объектлари, архив ҳужжатлари, давлат музейлари ва муҳофаза этиладиган табиий ҳудудлар, жумладан, хиёбонлар ва ботаника боғлари хусусийлаштирилмайди.