Ижтимоий тармоқларда ижтимоий ходим кузатувида бўлган 86 ёшли аёлга тегишли парвариш кўрсатилмагани айтилган видео тарқалди.
Тошкент шаҳар ҳокимлиги Матбуот хизмати видеомурожаатда келтирилган айрим маълумотлар ўз тасдиғини топмаганини маълум қилди. Хусусан, хонадонда ичимлик суви мавжудлиги аниқланди.
"Табиий газ тармоғи мавжуд экани, газ жўмраги эса фуқаронинг хавфсизлигини таъминлаш мақсадида ижтимоий хизмат ходими томонидан вақтинча ечиб қўйилгани маълум бўлди," - дейилади хабарда.
Ҳокимликнинг таъкидлашича, ижтимоий ходим тасдиқланган жадвалга мувофиқ аёлнинг ҳолидан мунтазам хабар олиб, зарур хизматларни кўрсатиб келмоқда.
"Фуқаро белгиланган тартибда барча зарур ижтимоий хизматлар ва қўллаб-қувватлаш билан таъминланган. Унинг аҳволи мутасадди ташкилотларнинг доимий назоратида бўлиб, ижтимоий ёрдам кўрсатиш давом эттирилади," дейилади ҳокимлик Матбуот хизмати хабарида.
Шу билан бирга, Бош прокуратура мазкур ҳолат юзасидан Мирзо Улуғбек тумани прокуратураси томонидан терговга қадар текширув ўтказилганини маълум қилди.
Аниқланишича, 1940 йилда туғилган фуқаро Л.Ж. хонадонда ёлғиз яшаган ва бир қатор касалликлар туфайли диспансер ҳисобида турган.
Текширув давомида маълум бўлишича, унга тегишли кўчмас мулк 2025 йил 25 сентябрда нотариал тартибда расмийлаштирилган олди-сотди шартномаси асосида бошқа шахсга қайта расмийлаштирилган.
Ҳуқуқ-тартибот идоралари битим ҳолатларини, жумладан, аёл ҳужжатларни расмийлаштириш пайтида ўз ҳаракатларининг аҳамиятини тўлиқ англамаган ва уларни бошқармаган бўлиши мумкинлигини ўрганмоқда. Шунингдек, эҳтимолий фирибгарлик ҳақидаги тахмин ҳам текширилмоқда.
Мазкур ҳолат юзасидан ЖКнинг 168-моддаси 4-қисми "а" банди (фирибгарлик) билан жиноят иши қўзғатилган. Тергов ҳаракатлари олиб борилмоқда.
Изоҳ