"Хавфсиз ва соғлом юрт" тезкор-профилактик тадбирлари доирасида Давлат хавфсизлик хизмати ва "Тошкент-Аэро" ихтисослаштирилган божхона комплекси ходимлари томонидан Ўзбекистонга йирик миқдордаги синтетик гиёҳвандлик воситаларини олиб киришга уринишнинг олди олинди.
Тошкент халқаро аэропортида Бангкок - Шаржа - Тошкент йўналиши бўйича учиб келган Қозоғистон фуқаросининг қўл юки кўздан кечирилди.
Текширув давомида саккизта қадоқланган ширинликлар ва бешта пластик идишда жами 4,4 кг мефедрон синтетик гиёҳвандлик моддаси борлиги аниқланган.
Кейинроқ гиёҳванд моддаларни қабул қилувчи 20 ёшли Янгийўл шаҳри фуқароси қўлга олинди. У тақиқланган моддани Тошкентдаги меҳмонхоналардан бирида гиёҳванд моддаларни сотиш бўйича интернет-дўкон маъмури кўрсатмаси билан олиши керак эди.
Шахсий тинтув чоғида ушланган шахсдан пневматик тўппонча ҳам топилди ва тегишли тартибда олиб қўйилди.
Мазкур ҳолат юзасидан ЖКнинг 246-моддаси 2-қисми билан жиноят иши қўзғатилиб, тергов ҳаракатлари олиб борилмоқда. Гумонланувчиларга нисбатан қамоққа олиш тарзидаги эҳтиёт чораси қўлланилди.
Изоҳ