Президент мамлакатда "Яшил макон" дастури доирасидаги ботаника боғлари ва дендрология боғлари концепцияси билан танишди, деб хабар бермоқда давлат раҳбари матбуот хизмати.
Қайд этилишича, бугунги кунда мамлакатда 3 та ботаника боғи фаолият кўрсатмоқда. Лойиҳа доирасида яна 12 та ботаника боғи ва 16 та дендрология боғи ташкил этиш режалаштирилган. Бунда ҳар бир ҳудуд учун тупроқ-иқлим шароитидан келиб чиқиб, энг мақбул дарахт ва бута турлари танлаб олинади.
2028 йилгача Қорақалпоғистон Республикаси, барча вилоятлар ва Тошкент шаҳрида 100 гектардан кам бўлмаган майдонда ботаника боғлари ва дендрология боғларини ташкил этиш режалаштирилган. 2030 йилга бориб мамлакатнинг умумий кўкаламзорлаштириш даражаси 14,2 фоиздан 30 фоизга ошиши, PM2,5 ва PM10 концентрацияси 20-25 фоизга камайиши ва иқлими оғир ҳудудларда ўртача ҳаво ҳарорати 1,5-2 даражага пасайиши кутилмоқда.
Шу ерда пойтахтимизда Миллий дендрология боғини ташкил этиш концепцияси тақдимот қилинди. Ушбу йирик яшил ҳудуднинг умумий майдони 108 гектарни ташкил этади. Лойиҳа доирасида 50 минг туп дарахт ва 100 минг туп бута кўчатлари экиш режалаштирилган. Боғ биологик хилма-хилликни сақлаш, ҳаво сифатини яхшилаш, углерод ютилишини кўпайтириш, илмий-тадқиқот ва селекция ишларини ривожлантириш, шаҳар микроиқлимини соғломлаштиришга хизмат қилади. Бу ҳаво ҳароратини 2-4 даражага пасайтириш ва намликни 10-15 фоизга ошириш имконини бериши кутилмоқда.
Миллий дендрология боғи нафақат яшил ҳудуд, балки илмий, маърифий ва жамоат майдони сифатида ташкил этилмоқда. Бу ерда "Дунё дарахтлари" зонаси, олтита иқлим минтақаси ўсимликлари коллекцияси, мевали ва маҳаллий дарахт турлари массивлари, доривор ўсимликлар боғи, оранжерея, гулзорлар, дам олиш масканлари, пиёдалар ва велосипед йўлаклари, автотураргоҳ ва сайёҳларни қабул қилиш майдончаси барпо этиш режалаштирилган.
Боғнинг марказий қисмида 1 гектар сунъий кўл ва унинг атрофида сакура боғи барпо этиш режалаштирилган. Инфратузилмада замонавий экологик технологиялар - қуёш панеллари, қайта ишланган материаллардан ясалган ўриндиқ ва шийпонлар, автоматлаштирилган томчилатиб суғориш тизими қўлланилади.
Бу боғ Марказий Осиё атроф-муҳит ва иқлим ўзгаришини ўрганиш университети (Green University) учун табиий лаборатория, аҳоли учун биотуризм ва экологик маърифат маркази бўлади.
Изоҳ