Аввалроқ, ижтимоий тармоқда Андижондаги мактабда ўқувчи қизларни ўтириб-турғизилаётгани акс этган видео тарқалди. Ҳолат юзасидан Андижон шаҳар мактабгача ва мактаб таълими бўлими маълумот берди.
Қайд этилишича, ҳодиса 12 сентябрь куни Андижон шаҳридаги 5-умумтаълим мактабида кузатилган.
Мактабнинг 10-“З” синфининг ўқувчилари соат 9:20 да мактабга келишганлиги, улар томонидан мунтазам дарсга кеч қолиш ҳолатлари кузатилаётганлиги боис мактабнинг маcъул ходими Д.Т. томонидан ўқувчилар тартибга чақирилган.
Ушбу ҳолат мактаб директори томонидан назоратга олиниб, ўқувчилар дарсларга киритиб юборилган ҳамда ўқувчиларнинг ота-оналари билан дарс жараёнлари 8:00 дан бошланиши ва ушбу вақтда ўқувчиларни мактабга келишларини таъминлаш зарурлиги юзасидан суҳбат олиб борилган.
Шунингдек, мактаб директори томонидан масъул ходим Д.Т.га ўқувчилар билан педагогик этика қоидаларига риоя этган ҳолда муносабатда бўлиши юзасидан тушунтириш ишлари олиб борилиб, унга нисбатан интизомий чора қўлланилди.
