Ҳуқуқни муҳофаза қилувчи орган ходимлари томонидан ўтказилган тадбирда Тошкент шаҳар Сергели тумани ИИО ФМБ 2-сонли ИИБ профилактика инспектори 5 минг АҚШ долларини пора сифатида олган вақтида ушланди. Бу ҳақда ДХХ Матбуот хизмати хабар берди.
Аниқланишича, у ушбу пул маблағи эвазига, ўзаро жанжал оқибатида хорижий фуқарога тан жароҳати етказгани бўйича маҳаллий фуқарога нисбатан жиноят иши қўзғатмасдан, ҳолатни маъмурий ҳуқуқбузарлик сифатида малакалашни ваъда қилган.
Ҳозирда мазкур ҳолат юзасидан жиноят иши қўзғатилиб, ушбу шахсга нисбатан қамоқ эҳтиёт чораси қўлланилган.
