Ўзгидромет хабарига кўра, ушбу ҳафтанинг ўртасидан Ўзбекистоннинг ғарбий ҳудудларига Волга бўйи ҳудудларидан нисбатан салқин ҳаво кириб келди. Икки кун давомида Қорақалпоғистон Республикаси ва Хоразм вилоятида ҳаво ҳарорати +7...+10 даражага пасайди ва кеча кундузи +30...+35 даражани ташкил этди.
Бугун Бухоро, Навоий вилоятларида, шанба ва якшанба кунлари марказий, жанубий ва шарқий вилоятларда ҳаво ҳарорати бироз пасаяди. Республиканинг катта қисмида ҳароратнинг пасайиши шимолий ҳудудлардек сезилмайди. Кундузги ҳарорат +33...+38 даражагача пасаяди.
Бугун ва дам олиш кунлари республика бўйича қуруқ об-ҳаво сақланиб туради, фақат тоғли ҳудудларда шанба ва якшанба кунлари қисқа муддатли ёмғир ёғиши ва момақалдироқ бўлиши мумкин.
9-11 июнь кунлари республиканинг баъзи жойларида шамол тезлиги соатига 17-22 м/с гача кучайиши, айрим жойларда чанг-тўзон билан кузатилиши мумкин.
Пойтахтда 9-11 июнь кунлари ҳаво бироз булутли бўлади, вақти-вақти билан ўзгариб туради, ёғингарчилик кутилмайди. Шарқий шамол йўналишини ўзгартириб, ғарбдан 5-10 м/с тезликда эсади, 9-10 июнда 12-15 м/с гача кучайиши мумкин. Ҳарорат бугун кундузи +38...+40 даража, дам олиш кунлари +36...+38 даража бўлади.
Ҳароратнинг пасайиши узоқ давом этмайди. Кейинги ҳафтада ҳарорат фони аввалги +35...+40 даража шимолда, жанубда ва чўл ҳудудларда +41...+42 даражагача бўлган қийматларга қайтади.
