Тошкент шаҳар Юнусобод туманидаги Амир Темур ва Чинобод кўчалари чорраҳаси ёнида 18 дона элдор қарағайдан 10 тупи номаълум кимсалар томонидан тунда арралаб кетилди, дея хабар берди Экология ва атроф-муҳитни муҳофаза қилиш Ахборот хизмати.
Аниқланишича, шу ерни аукцион орқали қўлга киритган фуқаро ушбу дарахтларни бошқа жойга кўчиришга рухсат беришни сўраб мурожаат қилган. Тошкент шаҳар Экология ва атроф-муҳитни муҳофаза қилиш бошқармаси бунга рад жавобини берган.
Шундан сўнг, экологлар ушбу дарахтларни қуритмасдан сақлаб қолиш мақсадида Ботаника институти мутахассисларини жалб қилган ҳолда агротехник тадбирларни олиб бориб, уларни асраб қолиш чораларини кўришди.
Манбанинг айтишича, орадан маълум вақт ўтгач, қора ниқоб таққан шахслар кечаси шу атрофда пайдо бўлиб, яна 4 та дарахтни кесиб кетишган. Бу ернинг эгаси Ж.Г.эса дарахт кўчирилишига рухсат берилмагани ва шу билан унинг ҳуқуқлари бузилганлигини айтиб экологлар устидан судга шикоят қилган. Суд эса ушбу аризани қаноатлантиришни рад этган.
Ҳозирда мазкур ҳолат юзасидан тўпланган ҳужжатлар Юнусобод туман прокуратурасига юборилган.
