Олтиариқ узумчилик тажрибасини янада оммалаштириш мақсадида Фарғонадан Навоий вилоятининг Кармана туманига президент совғаси сифатида 6 хил навдаги экспортбоп узум кўчатлари жўнатилди. Бу ҳақда ЎзА хабар берди.
Тадбирда Фарғона вилояти ҳокими Хайрулло Бозоров, туман секторлар раҳбарлари, нуронийлар, қишлоқ хўжалиги мутахассислари, деҳқон ва фермерлар иштирок этди.
"10 гектар майдонга қудуқ қазиш учун 120 миллион сўм субсидия ажратиляпти. Бу деҳқон ва фермерларга жуда катта имконият. Ишчи ўрни яратиб, экспорт салоҳиятимиз ортмоқда. Бугун Кармана туманига ҳам 200 гектардан зиёд майдонга экиш учун "Ризамат ота", "Мерседес", "Кетмонсопи", "Ҳусайни" каби 6 хил навдаги узум кўчатларини юборяпмиз. Ўзимиз ҳам бориб, Олтиариқдаги каби боғларни яратишга ҳиссамизни қўшамиз", - деди Олтиариқлик узумчилик кооперацияси раҳбари Исажон Бойматов.
Қайд этилишича, Фарғона вилоятидаги 7 минг 834 гектар узум боғларидан 2 минг 250 гектаридан зиёди айнан Олтиариқ туманида жойлашган. Мамлакатда узумчиликни ривожлантиришда ушбу туман намуна сифатида олинган.
