Олдинроқ, Тошкентда қатор ҳудудлар ичимлик сувисиз қолгани ҳамда "Тошкент шаҳар сув таъминоти" бунга сув билан таъминловчи иншоотдаги электр таъминотида носозлик келиб чиқишини сабаб қилиб кўрсатгани ҳақида хабар бергандик.
Ҳолат юзасидан Энергетика вазирлиги муносабат билдирди.
Айтилишича, пойтахт аҳолисини сув билан таъминловчи “Қодирия” сув иншооти 3 та бир бирига боғлиқ бўлмаган электр узатиш тармоқлари орқали электр энергияси билан таъминланади.
“Бугун, 3 декабрь куни ушбу тармоқларнинг 2 тасида қисқа муддатли (12 дақиқа) ўчиш содир бўлди. Бу вақтда учинчи электр узатиш тармоғи орқали “Қодирия” сув иншооти электр энергияси билан таъминланган.
Шундай қилиб, электр энергиясининг бу ҳолати Тошкент аҳолисининг сув таъминотида узилишларга сабаб бўлмаган”, - дейилади муносабатда.
