Самарқанд вилояти Булунғур туманида ўзига тегишли бўлган, лекин сотиш ҳуқуқига эга бўлмаган ер майдонини сотмоқчи бўлган шахс қўлга олинди. Бу ҳақда Самарқанд вилояти ИИБ Ахборот хизмати хабар берди.
Маълум бўлишича, шу йилнинг 12 декабрь куни соат 13:30 атрофида Самарқандда яшовчи Ш.Б. сотиш хуқуқига эга бўлмай туриб, ўзига тегишли 50 сотих ер майдонини $34 мингга махаллий фуқарога сотишга келишиб, ундан $10 мингни олган вақтда ИИБ бўлими ва ДХХ ходимлари томонидан қўлга тушди.
Аниқланишича, ушбу пулнинг $3 мингини Давлат солиқ қўмитаси ҳузуридаги Давлат кадастрлар палатаси Булунғур тумани филиалининг юқори лавозимида ишловчи ходими ушбу ер майдонини тегишли кадастр ҳужжатларини тайёрлаб бериш эвазига талаб қилган.
Шундан сўнг, ушбу кадастр ходими $3 мингни ўз хизмат автомашинасида олган вақтда тезкор ходимлар томонидан ашёвий далиллар билан қўлга олинди.
Ҳозирда юқоридаги ҳолатлар бўйича ЖКнинг тегишли моддалари билан жиноят иши қўзғатилиб, тергов ҳаракатлари олиб борилмоқда.
