Жорий йилнинг 7 октябрь куни ФИФА Низоларни ҳал этиш палатаси "Насаф" футбол клуби ва франциялик футболчи Абделае Диаките ўртасидаги низоли вазият юзасидан қарор чиқарган эди, бу ҳақда ЎзПФЛ ахборот хизмати хабар берди.
Унда кўрсатилишича, Қаршининг "Насаф" футболчи билан тузилган шартнома шартларини бажармаган.
Шу сабабли футболчи ФИФАга мурожаат қилган ва якунда ФИФА "Насаф" зиммасига белгиланган қарздорлик ва жарима тўловларини 45 кун мобайнида тўлаши лозим экани, агар мазкур мажбуриятлар клуб томонидан ўз вақтида бажарилмаса, клубга нисбатан миллий ва халқаро миқёсида янги футболчиларни рўйхатдан ўтказиш бўйича тақиқ қўйилиши ҳақида огоҳлантириш берган.
Бугун ФИФА 45 кунлик муддат якунига етганини инобатга олиб, "Насаф"га трансфер (футболчи сотиб олиш) тақиқи қўйди.
Энди клуб қишки трансфер ойнаси вақтида янги футболчиларни ўз сафига қўшиб олиш учун, мазкур низоли вазиятни ҳал этиши лозим бўлади.
