Ўзбекистонда 2025 йилда йўл ҳаракати қоидаларини бузганлиги учун жарима баллари ҳисобланган ҳайдовчилар бўйича статистика маълум бўлди.
Йўл-патруль хизмати ходимлари томонидан расмийлаштирилган маъмурий баённомалар асосида йўл ҳаракати қоидаларини қўпол равишда бузганлик учун жарима балларини ҳисоблаш 2025 йил 1 июндан жорий этилди.
ЙҲХББ матбуот хизмати раҳбари Зоир Йўлдошевнинг маълум қилишича, ўтган йили уч нафар ҳайдовчида 7,5 дан 8 баллгача жарима балли қайд этилган. Яна икки ҳайдовчи 6,5 баллдан 7 баллгача, 12 киши эса 5,5 баллдан 6 баллгача тўплаган.
Жарима баллари тизими қўлланилган ҳайдовчиларнинг асосий қисми - 165 193 киши - 0,5 дан 5 баллгача. Қайд этилишича, ўтган йилнинг сўнгги икки ойида 50 мингдан ортиқ ҳайдовчи жарима баллари олган.
Аввалроқ, 2025 йилнинг дастлабки беш ойида 114 мингдан ортиқ ҳайдовчи жарима балларини олгани ҳақида ёзган эдик.
Эслатиб ўтамиз, 2026 йил 1 апрелдан бошлаб автоматлаштирилган фото ва видеокамералар томонидан қайд этилган қоидабузарликлар учун ҳам жарима баллари ҳисобланади.
Ҳозирда баллар фақат ЙҲХБ ходимлари томонидан расмийлаштирилган маъмурий баённомалар бўйича қўлланилади.
Шунингдек, идора қоидабузарлик содир этилган вақтда транспорт воситасини бошқарган ҳайдовчига жарима баллари ҳисобланишини таъкидлади.
Бундан ташқари, Вазирлар Маҳкамаси қарорига кўра, 12 ой давомида йўл ҳаракати қоидаларини бузмаган ҳайдовчилар рағбатлантирилади: кейинги даврда биринчи марта қоидабузарлик содир этганда жарима балли ҳисобланмайди. 12 баллдан ортиқ жарима тўплаган ҳайдовчилар транспорт воситасини бошқариш ҳуқуқидан маҳрум этилади.
Комментарии