Россиянинг Ветеринар ва фитосанитар назорат федерал хизмати (“Россельхознадзор”) 22 июлдан Тошкент вилоятида етиштирилган помидор ва қалампир импортини тақиқлаб қўйди.
Бунга ушбу вилоятдан келтирилган маҳсулотларда “помидор жигарранг бужмайиш вируси” (Tomato brown fruit virus) ва пепино мозаика вируси (Pepino mosaic virus) аниқлангани сабаб бўлган.
22 июлгача юкланган партиялар фитосанитар экспертизадан ўтказилганидан кейин мамлакат ҳудудига олиб кирилишига рухсат берилади.
Қайд этилишича, Ўсимликлар карантини давлат инспекцияси томонидан тегишли тадқиқот натижалари ва вируслардан холи бўлган корхоналарнинг аниқ рўйхати юборилганидан кейин рухсат бериш масаласи Россия томонидан кўриб чиқилади.
