ДХХ, Бош прокуратура ҳузуридаги Департамент ҳамда Алкогол ва тамаки бозорини тартибга солиш инспекцияси ходимлари томонидан ўтказилган тезкор тадбирда муддати ўтган ҳамда тегишли ҳужжатлари бўлмаган товарларнинг йирик партияси аниқланган.
Хусусан, Тошкент шаҳрининг Яшнобод туманида жойлашган алкогол ва алкоголсиз ичимликлар савдоси билан шуғулланувчи иккита хусусий корхона омборхоналарида яроқлилик муддати ўтган товарларнинг йирик партияси аниқланган.
Жумладан, умумий қиймати 429 629 000 сўмлик 79 172 дона алкоголсиз ичимликлар ва 134 845 000 сўмлик 3374 дона алкоголли ичимликлар мусодара қилинган.
Шунингдек, кирим ҳужжатлари мавжуд бўлмаган 1 187 000 000 сўмлик 25 746 дона маҳаллий ва хорижда ишлаб чиқарилган турли алкогол маҳсулотлари аниқланган.
Текширув давомида аксарият алкоголсиз ичимликларнинг яроқлилик муддати махсус суюқлик ёрдамида ўзгартирилгани ва сотувга тайёрлангани маълум бўлди.
Аниқланган маҳсулотларнинг сифатини текшириш мақсадида экспертиза тайинланиб, терговга қадар текширув ишлари олиб борилмоқда.