Кеча, 7 февраль куни АҚШнинг Bering Air минтақавий авиакомпаниясининг бортида ўн киши бўлган самолёти Аляска осмонида радарлардан ғойиб бўлгани ҳақида хабар берган эдик.
Аляскада йўқолган ушбу самолёт бортида бўлган ўн кишининг барчаси ҳалок бўлди, дея хабар бермоқда Associated Press (АР) агентлиги АҚШ қирғоқ қўриқлаш хизматига таяниб.
"Шаҳар атрофига мўлжалланган кичик самолёт жума куни денгиз музидан топилди ва бортдаги 10 кишининг барчаси ҳалок бўлди," - дейилади баёнотда.
АҚШ қирғоқ қўриқлаш хизмати самолёт Ном шаҳридан тахминан 48 км жануби-шарқда ғойиб бўлганини тасдиқлади. Қутқарувчилар вертолёт ёрдамида самолётнинг турган жойини излашди.
Аниқлик киритилишича, марҳум бўлганларнинг икки нафари соғлиқни сақлаш нотижорат ташкилотига хизмат сафари билан борган. Қолганларининг шахси сир сақланмоқда. Ҳалокат сабаби ҳам ҳозирча маълум қилинмаган.