Жорий йил 7 февраль куни Канаданинг Монреал шаҳрида профессионал бокс оқшоми бўлиб ўтади.
Ушбу бокс оқшомида супероғир вазн тоифасида ўзбекистонлик профессионал боксчи Баҳодир Жалолов франциялик Девид Спилмонтга қарши рингга жанг қилиши керак эди.
Афсуски, шифокорлар ўзбекистонлик боксчига юзига чиққан учуқ сабаб жанг қилишга рухсат бермади.
"Бу нарса менда доим бўлган. Ҳаттоки Олимпиада мусобақасида ҳам юзимга 2-3 та учуқ чиққан. Жангим бекор бўлди, ушбу жангга жиддий тайёргарлик кўргандик. Лекин комиссия юзимдаги оддий учуқ сабаб жангни бекор қилди. Бундай бўлишини кутмагандим. Мени қўллаб-қувватлаб турганларга катта раҳмат," - деди Баҳодир Жалолов.
"Тез орада жангни бошқа жойда ўтказиш масаласи кўриб чиқилади. Чунки шунча тайёргарлик бекорга кетмаслиги учун бизга жанг керак. Агарда бундай ҳолат бўлишини олдинроқ билганимда Баҳодирнинг юзидаги учуқни "лезвие"да қирқиб ташлаган бўлардим" - деди кулумсираб Жалоловнинг мураббийи Тўлқин Қиличев.
Ушбу жангни ўтказиш бўйича боксчиларнинг томонлари қаерда бўлишидан қатъий назар жангни ўтказишга келишиб олишди ва Жалолов томони рақибларини Тошкентда жанг ўтказишга таклиф қилди. Рақиб томон эса ушбу таклифни муаммосиз қабул қилди.