Бугун, 28 январь авиакомпаниянинг 33 йиллик юбилейи куни HY101 рейси (Тошкент – Нью-Йорк) бортида ўғил фарзанд дунёга келди. Бу ҳақда авиакомпания Матбуот хизмати хабар қилди.
Таъкидланишича, парвоз давомида йўловчилардан бири туғруқ бошлади. Вазиятни баҳолаб, экипаж бригадаси бошқарувчиси овозли эълон орқали самолётдаги шифокорларни ёрдамга чақирган.
Чақириққа йўловчилар орасидаги шифокор-акушер ва жарроҳ жавоб беришган. Бир оз вақт ўтиб, йўловчи ўғил фарзандини дунёга келтирган. Шу муносабат билан экипаж Исландиянинг Кефлавик шаҳридаги захира аэродромига мажбурий қўниш қарорини қабул қилган
"Самолёт муваффақиятли қўнганидан сўнг, тиббиёт ходимлари бортга кўтарилиб, зарур ёрдам кўрсатишди. Она ва чақалоқ маҳаллий клиникага етказилди. Uzbekistan Airway ушбу ажойиб воқеа билан бахтиёр оилани табриклайди. Шунингдек, экипаж ва тиббий ходимларга ўзларининг профессионаллиги ва ҳамжиҳатликда кўрсатган ёрдамлари учун чуқур миннатдорлик билдиради", - дейилади хабарда.
