Хитой жануби-ғарбидаги Шигацзе шаҳри Динжи уездида кучли зилзила оқибатида кўплаб одамлар ҳаётдан кўз юмгани ва жароҳат олгани муносабати билан Ўзбекистон президенти Шавкат Мирзиёев Хитой Халқ Республикаси Раиси Си Цзиньпинга таъзия йўллади.
Давлат раҳбари ҳалок бўлганларнинг оила аъзолари ва яқинларига ҳамдардлик билдирди, жабрланганлар тез орада шифо топишини тилади.
Эслатиб ўтамиз, бугун маҳаллий вақт билан соат 09:00 атрофида Хитойнинг Непал билан чегараси яқинидаги Тибет автоном округида 6,8 магнитудали зилзила содир бўлди.
Маҳаллий ОАВ маълумотларига кўра, камида 95 киши ҳалок бўлган ва 130 киши жароҳатланган, 1000 дан ортиқ бино вайрон бўлган.
