Ижтимоий тармоқларда бухоролик 17 ёшли бола катта миқдордаги криптовалютани гўёки ўзи ишлаб топганлиги учун жавобгарликка тортилгани ҳақида хабар тарқалиб, кенг муҳокамаларга сабаб бўлган эди. Ҳолат юзасидан ИИВ Ахборот хизмати раҳбари Шоҳруҳ Ғиёсов расмий муносабат билдирди.
Маълум қилинишича, жиноят ишида гумонланаётган 17 ёшли З.М. 7 ой давомида “Бинанс” платформасида 4 мингдан ортиқ 34 млрд сўмлик шубҳали воситачилик (“виртуал валютчик”лик) операцияларини амалга оширган ҳамда воситачилик ҳақи ундириб келган.
Шоҳруҳ Ғиёсовнинг таъкидлашича, 34 млрд сўм ишлаб топилган “иқтидорли” йигитнинг даромади эмас, балки тизимдан ўтказилган бошқа бир инсонларнинг пули бўлган.
Мазкур операциялар таҳлил қилинганда З.М. айлантирган маблағларнинг аксарият қисми пенсия, ойлик, онлайн кредит карталаридан келиб тушганлиги маълум бўлган.
Қайд этилишича, ушбу маблағлар фирибгарлик йўли билан ўзлаштирилган пулларни легализация қилишга ва уларни изини йўқотишга қаратилган ҳаракат эканлиги гумон қилинмоқда. Бунга жавобни эса тергов ва суд органлари беради. Айбсизлик презумпциясига ҳам тўлиқ амал қилинади.
"Ушбу жиноят иши тўғрисида чиқишлар қилаётган айрим тармоқ фойдаланувчилари ўз ҳаракатлари билан жамоатчиликни чалғитиб, унинг холис тергов қилинишига халақит қилишини оқлаб бўлмайди",- дейилади хабарда.