Марказий банк бир жисмоний шахсга берилиши мумкин бўлган карталар сонини вақтинчалик чеклаш масаласини кўриб чиқмоқда (битта ЖШШИР учун).
Хусусан, банк карталари билан шубҳали операцияларнинг олдини олиш, жисмоний шахсларга тегишли ҳисобварақ ва карталарнинг фирибгарлик схемаларида иштирок этишини камайтириш мақсадида битта банкда 5 тагача ва барча банкларда 20 тагача карта (виртуал ва кобейджинг карталарини ҳисобга олган ҳолда) бериш таклиф этилмоқда.
Бунда ушбу талаб хорижий валютада очилган банк карталарига татбиқ этилмайди.
Регуляторнинг таъкидлашича, ижтимоий тармоқларда тарқатилаётган бир жисмоний шахс учун битта банк картасини бериш нормаси белгиланаётгани ҳақидаги маълумотлар ҳақиқатга тўғри келмайди.
Қайд этилишича, бугунги кунда банк карталарига эга бўлган жисмоний шахсларнинг қарийб 97 фоизи (22 млн) 5 тагача, 3 фоизи (770 минг) 5 тадан 20 тагача, 0,03%и (7 минг) 20 дан ортиқ карталарга эга.
Бир жисмоний шахснинг номига кўп сонли карталар очилган ҳолатларни таҳлил қилиш жараёнида бундай карталарнинг бир қисми (аксарият ҳолларда эгаларининг хабарисиз) фирибгарлик мақсадларида фойдаланилаётгани аниқланди.
"Муҳокама қилинаётган чора-тадбирлар фуқароларга банк карталаридан фойдаланган ҳолда тўловларни амалга оширишда ноқулайликлар яратмайди ва тижорат банкларининг банк карталарига нисбатан эмиссия фаолиятини тартибга солишга қаратилган," - дейилади хабарда.
Ушбу талаблар узил-кесил ишлаб чиқилгач, улар кенг жамоатчилик муҳокамасига қўйилади.