Давлат Думаси раисининг ўринбосари Пётр Толстой Федерация Кенгашидаги тингловда постсовет ҳудудидаги мамлакатларда рус тилини ўқитиш масаласини кўтариб, республикаларда инглиз тилини ўрганишга устунлик берилаётгани, рус тилини миллий тиллар билан сиқиб чиқаришга ҳаракат қилинаётганини таъкидлаган.
"Рус тилисиз Россия бўлмайди, мамлакатимиз мавжудлигининг маъноси йўқ, халқимизда асрлар давомида шаклланган тушунчаларнинг бутун туркуми йўқ", —
деди Давлат Думаси раисининг ўринбосари.
Қолаверса, хорижликларнинг Россияда хизмат кўрсатиш соҳасида ишлашини тақиқлаш орқали бу ҳолатга қонунчилик таъсирини ўтказиш мумкинлигини билдирди.
“Агар рус тили давлат тили бўлмаса, кечирасиз, бу мамлакатлар фуқаролари бизнинг жамоат жойларида — ҳайдовчи, сотувчи, курьер бўлиб ишламаслиги керак. Бундай чора-тадбирлар аста-секин вазиятни тўғрилайди”, — дейди Петр Толстой.
Юқорида қайд этилган фикрлар тармоқларда турли муҳокамаларга сабаб бўлмоқда.
Натижада “Миллий тикланиш" ДП МК раиси Алишер Қодиров Толстойнинг ўзи ишлашни ўрганишини, бу рус тилига қачонлардир ҳақиқий ҳурмат пайдо бўлишига олиб келиши мумкинлигини таъкидлади.
"Ўзбек тилини билмайдиган хизматчиларни ишдан ҳайдашни таклиф қилишимиз керак(ми?) Биз бошқа йўлдан борамиз - уларга ўзбек тилини ўргатамиз", — деб ёзади Алишер Қодиров.
Шунингдек, "Юксалиш" умуммиллий ҳаракати раиси Бобур Бекмуродов ҳам ўзининг телеграм каналида Ўзбекистон Депутат Петр Толстойнинг томорқаси эмаслиги, у ўз мамлакати ва фуқаролари муаммолари билан шуғулланиши кераклигини билдирди.
“Ўзбекистонда рус тили эркин мулоқот тили. Биз иттифоқчи мамлакат мақомига мос ишлаяпмиз. Депутат Толстой эса йўқ. Жаноб Толстой, Ватандошларимиз Россияда ўз меҳнати учун ҳукуматингиз белгилаган тўловларни тўламоқда. Уларнинг оилаларига юбораётган пулини тақсимлаш сизнинг ваколатингизга кирмайди.
Рус тилида сўзлашувчи ватандошларимиз ҳақида эса ўзимиз қайғурамиз", — дейди "Юксалиш" умуммиллий ҳаракати раиси.