Кеча, 22 октябрь куни Тошкент шаҳар Шайхонтоҳур тумани Лабзак даҳасида жойлашган кафеларнинг бирида ёнғин содир бўлгани акс этган фото ва видео ижтимоий тармоқларга сиздирилди.
Потребитель.Уз манбасининг хабар беришича, маҳаллий фуқаролардан бири ушбу кафега ташриф буюрувчилар ўша ерда яшайдиган аҳолининг тинчини бузаётганлиги ҳақида бир неча бор турли идораларга мурожаат қилган, аммо ҳеч қандай натижа бўлмаган.
Бугун тунда ушбу кафеда ёнғин содир бўлди. Ёнғин кафенинг ертўла қисмидан бошланди. Кафе ишчилари кабоб ускуналарини ертўлага олиб тушиб у ерда кабоб тайёрлашган, дейилади хабарда.
Ушбу хабарни ижтимоий тармоқларга сиздирган маҳаллий аҳолидан бирининг сўзларига кўра, у ёнғин қутқарув қисмига қўнғироқ қилиб ўт ўчирувчиларни чақирган.
Ўт ўчирувчиларга тасанно, улар зудлик билан воқеа жойига етиб келишди ва тезкорлик билан ёнғинни бартараф этишди, дейилади фуқаронинг мурожаатида.
Ҳозирда ёнғин қандай содир бўлгани, тан жароҳатлар ва ҳудудга етказилган зарар бўйича ҳеч қандай расмий маълумот берилмади.
Ушбу ҳолат юзасидан маълумот олиш учун UzNews.uz журналисти Тошкент шаҳар Фавқулодда вазиятлар бошқармаси билан боғланди, ФВБ Ахборот хизмати ёнғин содир бўлгани юзасидан хабари йўқлиги, бу бўйича ўрганиб, кейин батафсил маълумот беришини маълум қилди.