Фарғона шаҳридаги ҳайвонот боғида зебра ҳалок бўлди. Бу ҳақда Фарғона вилоят Экология бошқармаси Матбуот хизмати хабар берди.
Боғ директори ҳолатга изоҳ берар экан, зебралар асосан 10-15 йил умр кўришини таъкидлаб, 5 ёшида ҳайвонот боғига келтирилган зебра ҳозирда келганига 7 йил бўлиб, 12 йил умр кўргани боис қариб ўлганини айтиб ўтди.
Фарғона вилоят прокуратураси, вилоят Экология бошқармаси, Ветеринария ва чорвачиликни ривожлантириш бошқармаси ва бошқа тегишли ташкилотлар иштирокида далолатномага асосан зебра жасади текширилиб, ҳозирда лабораторияда таҳлил ишлари олиб борилмоқда.
“Африка ёввойи отлари ҳамда отлар кенжа уруғи — Зебра ҳайвони жуда эҳтиёткор, тез югуради. 1-1,5 ёшида вояга етади. Қўлга ўрганади, тутқунликда кўпаяди. Вазиятнинг қулай комбинацияси билан табиий шароитда зебралар 10 йилгача, асирликда эса 15 йилгача яшаши мумкин. Қимматли териси учун кўплаб овланиши туфайли сони кескин камайиб кетган”, — дейилади хабарда.
Эслатиб ўтамиз, февраль ойида Фарғона вилоятидаги ҳайвонот боғида Максим лақабли жирафа нобуд бўлганди.