Бугун, ижтимоий тармоқларда ЙТҲ натижасида 8 нафар фуқаро вафот этгани акс этган видеолар тарқалган эди. Ушбу ҳолат юзасидан Тошкент вилояти ИИББ расмий изоҳ берди.
Маълум қилинишича, мазкур воқеа жорий йилнинг 9 июнь куни Тошкент вилояти Зангиота тумани ҳудудидан ўтган М-34 "Тошкент-Душанбе" автомобиль йўлида содир бўлган.
Аниқланишича, видеода кўрилгани каби, Spark автомобили ҳайдовчиси ҳаракат давомида бошқарувни йўқотиб, йўлнинг қарама-қарши тарафига чиқиб кетиши оқибатида, шу йўналишдаги Damas билан тўқнашиб кетган.
Натижада ушбу йўналишдаги 3 та автомобиль техник шикастланган.
Таъкидланишича, 8 та эмас 1 нафар фуқаро, қарама-қарши йўлга чиқиб кетган Spark ҳайдовчиси вафот этган. Қолган иштирокчилар турли тан жароҳатлари олиб, шифохонага ётқизилган.
Ҳозирда ҳолат юзасидан туман прокуратураси томонидан тергов-суриштирув ишлари олиб борилмоқда.