Олий Мажлис Сенатининг ўттиз тўққизинчи ялпи мажлиси жорий йил 6 апрель куни соат 10:00 да Тошкент шаҳрида Олий Мажлис Сенатининг мажлислар залида ўз ишини бошлайди, дея хабар берди Олий Мажлис Сенати ахборот хизмати.
Видеоконференцалоқа тизимидан фойдаланган ҳолда ўтказиладиган мазкур ялпи мажлисда бир қатор қонунлар ва масалаларни муҳокама қилиш режалаштирилган.
"Давлат ҳисобидан юридик ёрдам кўрсатиш тўғрисида"ги, "МЖтКга Давлат чегарасини қўриқлаш ва ҳимоя қилишни янада кучайтиришга қаратилган қўшимча ва ўзгартишлар киритиш ҳақида"ги, "Хотин-қизлар ва болалар ҳуқуқлари, эркинликлари ҳамда қонуний манфаатларини ишончли ҳимоя қилиш тизими янада такомиллаштирилиши муносабати билан Ўзбекистоннинг айрим қонун ҳужжатларига ўзгартиш ва қўшимчалар киритиш тўғрисида"ги қонунлар шулар жумласидандир.
Шунингдек, "ЖКга коррупцияга оид жиноятлар учун жавобгарлик муқаррарлигини таъминлашга қаратилган ўзгартиш ва қўшимчалар киритиш тўғрисида"ги, "Ўзбекистон билан Қозоғистон ўртасида озодликдан маҳрум этилган шахсларни жазони ўташни давом эттириш учун топшириш тўғрисидаги Шартномани (Нур-Султон, 2021 йил 6 декабрь) ратификация қилиш ҳақида"ги, "Ўзбекистон Ҳукумати билан Озарбайжон Ҳукумати ўртасида ҳарбий соҳада ҳамкорлик тўғрисидаги Битимни (Тошкент, 2022 йил 21 июнь) ратификация қилиш ҳақида"ги ҳамда "Ўзбекистон Ҳукумати билан Озарбайжон Ҳукумати ўртасида ҳарбий-техникавий ҳамкорлик тўғрисидаги Битимни (Тошкент, 2022 йил 21 июнь) ратификация қилиш ҳақида"ги қонунлар муҳокама қилинади.
Шу билан бирга, сенаторлар Олий Мажлиснинг Инсон ҳуқуқлари бўйича вакилининг (Омбудсманнинг) 2022 йилдаги фаолияти тўғрисидаги ҳисоботини, Ташқи ишлар вазирлигининг 2022 йилдаги фаолияти тўғрисидаги ахборотини эшитади.
Ялпи мажлис видеоконференцалоқа тарзида жорий йилнинг 6-7 апрель кунлари ўтказилиши режалаштирилган. Ялпи мажлис Сенатнинг Youtube тармоғидаги саҳифаси орқали тўғридан-тўғри ёритиб борилади.