Болалар масалалари бўйича миллий комиссия маълумотларига кўра, ўтган йили 5 минг 227 нафар ота-она фарзандларини тарбиялаш ва ўқитиш бўйича ўз вазифаларини бажармагани учун маъмурий жавобгарликка тортилган.
Ота-оналик ҳуқуқини суиистеъмол қилгани, болаларни тарбиялашдан, уларнинг ҳуқуқ ва манфаатларини ҳимоя қилишдан бош тортгани учун 652 нафар боланинг ота-онаси ота-оналик ҳуқуқидан маҳрум этилган. Ижтимоий тармоқларда тарқалган болаларнинг ҳуқуқлари ва манфаатларини камситувчи 29 та ҳолат юзасидан тегишли назорат ўрнатилган.
Шунингдек, 2054 нафар болага ҳамда 1306 нафар ота-онага якка тартибда профилактик иш олиб борилиши белгиланган.
Оилалар ва болалар муассасаларига қаровсиз ва назоратсиз қолган 11 162 нафар бола жойлаштирилган.
Ўз вақтида туғилганлик гувоҳномасини олмаган 412 нафар болага гувоҳнома берилган. Бундан ташқари, 528 нафар бола гувоҳнома олмагани аниқланиб, бу борада тегишли чоралар кўрилмоқда.
Қайд этилишича, ўтган йили 13 та "Меҳрибонлик" уйи, 4 та болалар шаҳарчаси ва 2 та Меҳрибонлик уйи фаолияти тўхтатилгани боис, етим ва ота-она қарамоғисиз қолган болалар ўз оилалари ва яқин қариндошларига тарбия бериш учун топширилган.
Уй-жойга муҳтож етим болалар ва ота-она қарамоғидан маҳрум бўлган болалар учун 2022 йилда 397 та уй-жой харид қилинган. Шу мақсадда Давлат бюджетидан 57 млрд сўм маблағ йўналтирилган.
Етим болалар ва ота-она қарамоғидан маҳрум бўлган болаларнинг орзу-истакларини рўёбга чиқаришга кўмаклашиш бўйича “Меҳр дафтари” тизими йўлга қўйилиб, “Меҳр дафтари” жамғармасига 86,1 млрд сўм маблағ ажратилган.