Бугун, 7 март куни эрталаб Тошкентда Афғонистоннинг қўшни давлатлари махсус вакилларининг биринчи йиғилиши ўз ишини бошлади. Бу ҳақда Дунё АА хабар берди.
Учрашувни Ўзбекистон Президентининг Афғонистон бўйича махсус вакили Исматулла Иргашев очди.
Қайд этилишича, учрашувда Эрон, Хитой, Покистон, Россия, Тожикистон, Туркманистон ва Ўзбекистон делегациялари Афғонистондаги мавжуд вазиятни, жумладан, гуманитар жиҳатларни муҳокама қиладилар ҳамда мамлакатдаги вазиятни тартибга солиш ва томонларнинг ўзаро ҳамкорлиги масалаларини кўриб чиқадилар.
Учрашувда иштирокчилар Афғонистонга қўшни давлатлар махсус вакилларининг иккинчи учрашуви ўтказиладиган жой ва вақтни белгилайди, шунингдек, Афғонистонга қўшни давлатлар ташқи ишлар вазирларининг Тошкент шаҳрида ўтказиладиган 4-учрашувини ўтказиш муддатлари юзасидан фикр алмашади.