Тошкент шаҳрининг Сергели туманида ИИО ходимлари героин савдосига чек қўйишди. Гиёҳванд моддаларни савдосида "закладчик"лик қилган шахс қўлга олинди. Бу ҳақда Тошкент шаҳар ИИББ Матбуот хизмати хабар бермоқда.
Маълум қилинишича, 12 февраль куни кечаси 30 ёшли А. кўчада гиёҳванд моддаларни яширмоқчи бўлган вақтда қўлга олинган. Унинг ёнидан умумий оғирлиги 160 грамм бўлган, ўзига хос ҳидли, кулранг-жигарранг моддага эга 50 та сумка топилган. Экспертиза унинг героин эканлигини аниқлаган.
Қўлга олинган шахснинг сўзларига кўра, унинг ўзи ҳам гиёҳвандлик воситаларини истеъмол қилиб юрган.
"Интернет-дўконлардан ўзимга дори сотиб олдим. Бироз вақт ўтгач, улар мен билан боғланиб, ишга таклиф қилишди. Мен рози бўлдим", - дейди у.
Биринчи топшириғида у бир пакетда гашиш олиб, кўрсатилган жойга яшириб қўйган. Эркак иккинчи топшириққа ҳам рози бўлган. Аммо, ишни амалга ошираётган пайтида уни жиноят устида қўлга олишди.
Мазкур ҳолат юзасидан Жиноят кодексининг 273-моддаси 5-қисми (Гиёҳвандлик воситалари, уларнинг аналоглари ёки психотроп моддаларни кўп миқдорда қонунга хилоф равишда сотиш) билан жиноят иши қўзғатилган.
Маълумот учун, мазкур моддада 10 йилдан 20 йилгача озодликдан маҳрум қилиш жазоси берилиши кўрсатилган.