2022 йилнинг август ойида Тошкент вилояти Қуйи Чирчиқ туманида эр рашк сабаб турмуш ўртоғини у ишлайдиган боғчада бўғиб, ургани эртаси куни уйида фарзандини кўз ўнгида пичоқ билан ўлдиргани ҳақида хабар бергандик.
"Миллар" информацион дастурида маълум қилинишича, Жиноят ишлари бўйича Қуйи Чирчиқ тумани судида 32 ёшли эрга суд ҳукми ўқилди.
"Аёлим билан ажрашиш учун ариза бергандим. Аёлим билан ишлайдиган ҳамкасби менга телефон қилиб, аёлим бошқа билан учрашиб юрганини айтганди. Кейин, шубҳаланиб, аёлимнинг телефонини олиб қўйганман. Телефонга бегона эркакдан хабар келган. Жаҳлим чиқиб, кечаси аёлимнинг ота уйига борганман. Аёлим билан бироз гаплашиб ўтирганимиздан кейин бегона эркакдан яна хабар келган. Пичоқ аёлимнинг қўлида эди, уни тортиб олмоқчи эдим бўйнига кириб кетди. Икки нафар фарзандим бор. Қилган ишимдан мингдан-минг пушаймонман", - дейди судланувчи эркак.
Марҳуманинг отаси, судланувчига умрбод қамоқ жазоси талаб қилди.
"Бундайларни яшашга ҳақи йўқ. Оталар ўзини менинг ўрнимга қўйиб кўрсин. Бошқаларга ўрнак бўлсин. Жиноятчилар абадий қамоқдан қўрқиб, бировни ўлдирмайди", - дейди марҳуманинг отаси.
Суд ҳукми билан эркак ЖКнинг 97-моддаси (Қасддан одам ўлдириш) 2-қисмининг «ж» банди ҳамда 164-модданинг (Босқинчилик) 1-қисми билан айбдор деб топилиб, унга нисбатан 19 йил озодликдан маҳрум қилиш жазоси тайинланди.