Олий мажлис Қонунчилик палатаси депутати Расул Кушербаев ИИВ матбуот котиби Шоҳрух Ғиёсовнинг Ўзбекистонда митинглар ўтказилаётгани ҳақидаги баёнотига муносабат билдирди.
Эслатиб ўтамиз, аввалроқ Шоҳрух Ғиёсов "Митинглар, йиғилишлар ва намойишлар тўғрисида"ги қонун лойиҳаси 2019 йилда муҳокамага қўйилгани, бугун эса қайта кўриб чиқиш учун муҳокамадан олиб ташланганини айтганди. Матбуот котибининг таъкидлашича, яқин орада лойиҳа яна жамоатчилик муҳокамасига қўйилади.
"Қонун ҳалигача қабул қилинмаганлигидан келиб чиқиб, фуқаро ва блогер О.Хайдаров МЖтКнинг 201-моддасида назарда тутилган йиғилишлар, митинглар, кўча юришлари ёки намойишлар ташкил этиш ва ўтказиш учун қонунга хилоф равишда жазоланган", - деб ёзади депутат.
Бундан ташқари, Кушербаевга кўра, ишни кўрган судя қонун ва фуқароларнинг ҳуқуқларини бузган. Суд қарорида фуқаро Маъмурий жавобгарлик тўғрисидаги кодекснинг 201-моддасида назарда тутилган жинояти учун қандай асосда жазолангани ҳақида ҳеч қандай изоҳ ва аниқлик киритилмаган.
ЖКнинг 231-моддасига кўра, қасддан адолатсиз ҳукм, қарор, ажрим ёки қарор чиқариш икки йилдан беш йилгача озодликни чеклаш ёки беш йилгача озодликдан маҳрум қилиш билан жазоланади.
"Бундан келиб чиқиб, ушбу иш доирасида материалларни тайёрлашда иштирок этган барча ходимлар ва судьянинг ҳаракатларига нисбатан ЖКнинг 231-моддасида белгиланган қонунбузарлик доирасида ҳуқуқий баҳо берилиши шарт”, — деб ёзади Кушербаев.