11 декабрга қадар Тошкент аҳолиси geonom.tashkent.uz платформасида метронинг янги бекатларига бир қанча номлар таклиф қилишди. Таклифлар орасида кўплаб ноодатий номларни учратиш мумкин. Лекин уларнинг орасида «Тошкент метросининг отаси» сифатида танилган академик Турсунбой Рашидов исми ажралиб турибди.
Академик Турсунбой Рашидов сейсмодинамика ва сейсмология соҳасида таниқли ва етакчи олим бўлган. У назарий ва амалий математика ҳамда тўлқинли механика илмий усуллари асосида 9 баллгача бўлган зилзилага бардош беришга мўлжалланган мустаҳкам Тошкент метроси биносининг қурилиш модели концепциясини яратган.
«Ўзбекистон Республикасида хизмат кўрсатган фан арбоби Рашидов иштирокида Тошкентнинг юқори сейсмик ва ноқулай ер шароитларида метрополитенни лойиҳалаштириш имкониятига асос солинган. Унинг илмий бошқаруви остида метроқурилиш тажрибасида илк бор метрополитен бекатлари ва ҳайдаш тоннелларининг янги сейсмочидамли конструкциялари ишлаб чиқилган ва жорий этилган», – деб айтиб берди Тошкент давлат транспорт университети профессори, техника фанлари доктори Абдураҳмон Эшонхўжаев.
Академик Рашидов бошчилигидаги ишчи гуруҳ Тошкент метроси илмий-техник концепцияси асосида Москвада жойлашган давлат қўмиталари, идоралар, илмий-тадқиқот институтлари ва турли вазирликлар вакилларини уч йил давомида ишонтирган. Қийин илмий дискуссия ва дебатлар натижасида, ишчи гуруҳ масалани ижобий ҳал қилишга эришган. Агар академик Рашидов томонидан ишлаб чиқилган сейсмочидамли метро моделининг концепцияси бўлмаганида ҳозир Ўзбекистон дунёдаги энг чиройли метролардан бири билан мақтана олмаслиги мумкин эди.
Шу муносабат билан, табиат ва инсон хавфсизлиги экологияси фанлари халқаро академиясининг жорий аъзоси Анвармизо Ҳусаинов янги метро бекатларидан бирини академик Рашидов шарафига номлашни таклиф қилди:
«Кенг жамоатчилик нигоҳида Тошкент метрополитенининг бекатларидан бирини сейсмодинамика ва сейсмология соҳасидаги атоқли олим Турсунбой Рашидов исми билан номлаш одилона бўлар эди».
Академик Рашидов хизматлари Ўзбекистоннинг биринчи президенти Ислом Каримов томонидан тилга олинган, у ўша вақтда ҳукумат номидан Тошкент метрополитени қурилиши лойиҳаси ишчи гуруҳининг вакили бўлган. Ислом Абдуғаниевич эса у вақтларда Давлат режаси раисининг ўринбосари лавозимида эди.
Шунингдек, академик Рашидов меҳнатлари президент Шавкат Мирзиёев томонидан ҳам қайд этилиб, академик Ўзбекистон мустақиллигининг 27 йиллиги шарафига «Меҳнат шуҳрати» ордени билан мукофотланган.