Мамлакат шимолидаги саҳрода махсус тактик ўқув-машғулоти ўтказилди, дея хабар бермоқда Мудофаа вазирлиги матбуот хизмати.
Ўқув машқларидан бири, яъни мудофаа жангини ташкил этиш бўйича мажмуавий тактик ўқуви ҳамда куч тузилмалари ҳамкорлигидаги махсус тактик ўқувлар мамлакат шимолида ўтказилди.
Мажмуавий тактик ўқув чегара қўшинлари бўлинмаларининг жанговар навбатчиликни ўташ вақтида тўғридан-тўғри шартли террорчилар ҳужумини қайтариши бўйича амалий ҳаракатлар билан бошланди.
"Ўқувларни Қорақалпоғистон Республикаси Жўқорғи Кенгеси раиси Aманбай Оринбаев, Мудофаа вазирлиги раҳбарияти, ҳарбий округлар вакиллари, ҳудуддаги куч тузилмалари мансабдорлари кузатиб борди", — дейилади хабарда.
Жанговар чизиқда жойлашган ўқув жойларида Ўзбекистон Мудофаа вазирлиги, Давлат хавфсизлик хизмати, Миллий гвардия бўйича Қорақалпоғистон Республикаси бошқармаси, Қорақалпоғистон Ички ишлар, Фавқулодда вазиятлар ҳамда Соғлиқни сақлаш вазирликлари бўлинмалари ҳамкорлигида махсус-тактик ўқувлар ўтказилди.
Машғулотда шартли равишда темир йўл транспортида ҳамда кўп қаватли бинода гаровга олинганларни озод этиш, блокпостга қилинган ҳужумни ҳамкорликда қайтариш, мерганлар жуфтлиги ҳаракати ҳамда аҳоли яшаш пунктида шартли душманни яксон қилиш бўйича махсус ҳаракатлар намойиш этилди.
