Санитария-эпидемиологик осойишталик ва жамоат саломатлиги қўмитаси раисининг биринчи ўринбосари Нурмат Отабеков жабрланганларнинг аҳволи ҳақида маълумот берди.
Бугун, 29 сентябрь соат 12:00 ҳолатига кўра, Тошкент вилоятидаги шифохоналарда боғчаларда заҳарланган 38 нафар бола қолмоқда.
Нурмат Отабековнинг таъкидлашича, улар ҳам тез орада касалхонадан чиқарилади. Ота-оналарга фарзандларининг саломатлиги тўғрисида мунтазам равишда маълумот бериб борилади.
Эслатиб ўтамиз, Тошкент вилоятининг етти туман ва шаҳарларида қарийб 2 минг нафар тарбияланувчи заҳарланган. Дастлабки маълумотларга кўра, уларнинг барчаси бир хил кефир истеъмол қилган. Мазкур ҳолат юзасидан жиноят иши қўзғатилган. 7 нафар гумонланувчи қўлга олинган.
Оммавий заҳарланишдан сўнг Бош прокуратура барча давлат мактабгача таълим ташкилотларига аутсорсинг шартномалари бўйича озиқ-овқат етказиб беришни кенг кўламли текширишни бошлади.
Комментарии