Қарийб 4 ой давомида реконструкция учун ёпилган Шота Руставели кўчаси Шаҳрисабз кўчасидан Чўпон ота кўчасигача автотранспорт воситалари ҳаракати учун очилди, деб хабар бермоқда пойтахт ҳокимлиги матбуот хизмати.
Айни пайтда Чўпон ота кўчасидан Янги Сергели кўчасигача бўлган масофада ишлар давом этмоқда.
Қайд этилишича, автотранспорт воситаларининг ҳаракатини очиш техник ҳисобланади, яъни техник ва технологик (қурилиш эмас) ишлар билан бирга олиб борилади. Қўшни маҳалла ва мавзелардан кириш-чиқиш йўллари, коммунал тизимларни ётқизиш, автобус бекатларини алоҳида тўсиқ билан ўраш ишлари якунланди.
"Шуни инобатга олишингизни сўраймизки, ушбу ҳудудда қисман ёритиш чироқлари ўрнатилган, вақтинчалик чизиқлар чизилган, автобус йўлагида тўхташ мажмуаларини ўрнатиш ишлари олиб борилмоқда. Замонавий йўл белгиларининг аксарияти аллақачон ўрнатилган, барча светофор мажмуалари уланган ва одатдагидек ишламоқда," - дейилади хабарда.
Жараёнларни якунига етказишга қаратилган ишлар тегишли хизматлар билан келишилган ҳолда давом эттирилади. Ушбу қарор пойтахтдаги транспорт ҳолатини юмшатишга қаратилган ҳаракатни босқичма-босқич йўлга қўйиш ва тиклаш бўйича умумий режанинг бир қисмидир.
Шу муносабат билан, аҳолидан иш жараёнида бартараф этилиши мумкин бўлган камчилик ва носозликларга тушуниш билан муносабатда бўлиш сўралди. Техника ва ишчиларнинг қатнов қисмида бўлишига алоҳида эътибор бериш керак.
Эслатиб ўтамиз, Шота Руставели кўчасини реконструкция қилиш ишлари жорий йилнинг ёз ойи бошида бошланган эди. Ҳокимлик лойиҳани 50 миллион долларга баҳолаган. Қайта қуриш лойиҳасининг ҳар бир босқичи шаффоф бўлиши учун расмий веб-сайт ишга туширилди, унда иш жараёнидаги янгиликлар эълон қилинди.
Комментарии