Ўзбекистоннинг Сан-Маринога тайинланган биринчи элчиси Абат Файзуллаев (қароргоҳи Римда жойлашган) мазкур давлат раҳбарлари – Капитан-регентлар Франческа Чиверкья ва Далибор Риккардига ишонч ёрлиқларини топширди, деб хабар бермоқда "Дунё" АА.
Тантанали маросимда Сан-Марино ташқи ишлар вазири Лука Беккари сўзга чиқиб аккредитациядан ўтган элчиларни олқишлади.
Вазир Лука Беккари Ўзбекистон раҳбари ташаббуси билан Ўзбекистонда олиб борилаётган кенг кўламли иқтисодий ва демократик ислоҳотларни, Ўзбекистон ва Сан-Марино ўртасидаги алоқаларни ривожлантиришга қаратилган саъй-ҳаракатларни, жумладан ушбу мамлакатга биринчи элчининг тайинланишини юқори баҳолади.
Ўзбекистон ва Сан-Марино ўртасидаги дипломатик муносабатлар 2021 йил 3 февралда ўрнатилган.
Эслатиб ўтамиз, Абат Файзуллаев 2023 йил ноябрь ойидан буён Ўзбекистоннинг Италиядаги элчиси ва Римдаги халқаро ташкилотлар (ФАО, ҚХРХЖ, БООД) ҳузуридаги доимий вакили ҳамда 2024 йил декабрь ойидан бошлаб Ўзбекистоннинг Кипрдаги элчиси сифатида фаолият юритиб келмоқда.