Тошкент вилоятида одам савдосига қарши тезкор тадбирлар ўтказилган. Тадбир давомида аёл ва қизларни шаҳвоний мақсадда Ўзбекистон ташқарисига олиб чиқмоқчи бўлган 8 нафар шахс далилий ашёлар билан ушланди. Бу ҳақда вилоят ИИББ Матбуот хизмати хабар қилди.
Оқибатда 5 нафар аёл одам савдоси қурбонига айланишининг олди олинди.
Хусусан, жорий йилнинг 15 февраль куни ўтказилган тадбирда 2006 йилда туғилган қизни Туркияга ноқонуний равишда олиб чиқмоқчи бўлган, Олмалиқ шаҳрида яшовчи 1998 йилда туғилган аёл Тошкент халқаро аэропортида қўлга олинган.
Ҳозирда ҳолат юзасидан ЖКнинг 135-моддаси бўйича жиноят иши қўзғатилди.
Шунингдек, ОИТС ни тарқатиш билан боғлиқ 13 та ҳолат аниқланиб, ушбу шахсларнинг бошқа фуқароларга инфекция юқтиришининг олди олинди.
Бундан ташқари, фоҳишахона сақлаш билан боғлиқ 85 та, фоҳишалик билан шуғулланиш бўйича эса 16 та ҳолат фош этилган.
"Барча гумонланувчиларга нисбатан қонунчиликка мувофиқ чоралар кўрилди",- дейилади хабарда.