Air Samarkand авиакомпанияси Матбуот хизмати хабарига кўра, Тошкент – Фукуок йўналишидаги 9S-1021 рейси 21 февраль куни соат 23:55 да жўнаши режалаштирилган эди, бироқ техник сабабларга кўра кечиктирилган.
Қайд этилишича, учиш вақтида экипаж шасси тебранишини сезиб, хавфсизлик қоидаларига мувофиқ, тўғри ва профессионал қарор қабул қилиб, парвозни тўхтатган. Самолёт терминалга қайтарилиб, муҳандислар томонидан батафсил текширувдан ўтказилди.
Текширув натижасида, муайян деталларнинг алмаштирилиши зарур экани аниқланган ва ҳозирда ушбу ишлар амалга оширилмоқда. Носозлик бартараф этилгач, самолёт қўшимча текширувдан ўтказилади.
Авиация қоидаларига мувофиқ, йўловчилар меҳмонхонага жойлаштирилди. Тахминий жўнаш вақти – 22 февраль, соат 22:00 (маҳаллий вақт).