Бугун Олий Мажлис Сенатида парламент юқори палатаси ҳузуридаги Ёшлар парламентининг биринчи мажлиси бўлиб ўтди. Унда Олий Мажлис Сенати Раиси Танзила Нарбаева иштирок этди.
Тадбирда сенаторлар, халқ депутатлари маҳаллий Кенгашларининг раислари, доимий комиссиялари аъзолари, ҳудудлардаги фаол ёшлар ва ОАВ вакиллари қатнашди.
Ёшлар парламентларининг 2 нафар аъзосининг Қонунчилик палатасига депутат, 20 нафари эса маҳаллий Кенгашлар депутатлари этиб сайланди.
Ёшлар парламентининг ваколат муддати тугаши муносабати билан унинг янгиланган таркиби шакллантирилди. Ишлаб чиқилган низомга кўра, унинг таркиби маҳаллий Кенгашлар тавсияси асосида 84 нафар 30 ёшгача бўлган депутатлардан, 10 нафар Ёшлар ишлари агентлиги ҳамда 6 нафар Сенатнинг тегишли қўмитаси тавсиясига асосан шакллантирилган.
Ёшлар парламентининг 100 нафардан иборат янги таркиби тасдиқланди.
Мажлисда ташкилий масала кўриб чиқилди. Унга кўра, Лайло Аслонова Ёшлар парламенти раиси этиб бир овоздан сайланди. Шунингдек, Иброҳимжон Жўрабоев ҳамда Азизбек Очилбоев Ёшлар парламенти раиси ўринбосарлари этиб тасдиқланди. Шунингдек, Ёшлар парламентининг комиссиялари раислари ва уларнинг аъзолари ҳам сайланди.
Ташкилий масаладан сўнг Сенат Раиси Танзила Нарбаева ўз нутқида Ёшлар парламенти ўз фаолиятида эътибор қаратиши лозим бўлган устувор вазифаларга тўхталиб ўтди.
Шунингдек, Ёшлар парламентининг келгусидаги устувор вазифалари ва режалари белгилаб олинди.