Қуръонни ёқиб юбориш акцияси ташкилотчиси Салван Момика Швецияда отиб ўлдирилди, дея хабар берди пайшанба куни SVT телеканали ҳуқуқ-тартибот идоралари ва манбаларга таяниб.
"Қуръон ёқувчи Салван Момика... чоршанба куни кечқурун Седертеледа отиб ўлдирилган," - дейилади мақолада.
Момикага пайшанба куни миллий хусусиятларга кўра нафрат уйғотишда айбланиб ҳукм чиқарилиши керак эди, аммо Стокголм суди судланувчилардан бири вафот этгани сабабли ҳукмни кейинга қолдирди, дейилади хабарда.
Полиция матбуот хизмати вакили Даниэл Викдалнинг телеканалга маълум қилишича, чоршанба куни кечқурун полиция ва тез тиббий ёрдам Сёдертельенинг турар-жой ҳудудида отишма хабари ортидан чақирилган. Хонадонда 40 ёшлардаги эркак отиб ўлдирилган ҳолда топилган. SVT манбаларига кўра, у 38 ёшли Момика бўлган. Полициянинг маълум қилишича, ҳуқуқ-тартибот идоралари томонидан тергов ҳаракатлари бошланган.
Expressen газетасининг хабар беришича, Момика отишмадан бироз олдин TikTok’да жонли эфир трансляция қилаётган бўлган. Нашрнинг ёзишича, воқеалар қисман жонли эфирга узатилган бўлиши мумкин, аммо бу маълумотларнинг тасдиғи йўқ.
Ироқлик муҳожир Момика Швецияда Стокголмдаги бош масжид ёнида мусулмонларнинг асосий байрами Қурбон ҳайитининг биринчи куни Қуръонни ёқиш бўйича бир нечта акцияларни ўтказган. Шов-шувли акция 2023 йил 28 июнь куни полиция рухсати билан ўтказилган.
Ироқ Швеция ҳукуматидан ҳаракатни уюштирган муҳожирни судга беришни талаб қилган. Ўнлаб ироқликлар Бағдоддаги Швеция элчихонаси ёнида норозилик намойиши учун тўпланишган. Кейинчалик Швеция ва Данияда Қуръонни ёқиш билан боғлиқ шунга ўхшаш ҳаракатлар бир неча бор ўтказилди.
Ислом ҳамкорлик ташкилоти ва унинг кўплаб аъзолари Қуръонни ёқишни кескин қоралади. Швеция ҳукумати Қуръонни ёқишга рухсат берувчи жамоат тартиби тўғрисидаги қонунни қайта кўриб чиқишни бошлашини маълум қилди.