Ўзбекистон элчиси Фурқат Сидиқов Канада генерал-губернатори мери Саймонга ишонч ёрлиқларини топширди, деб хабар бермоқда “Дунё” ахборот агентлиги.
Тақдимот маросимидан кейинги суҳбатда Канада генерал-губернатори Ўзбекистонда амалга оширилаётган изчил ижтимоий-иқтисодий ва демократик ислоҳотлар, Марказий Осиёда яхши қўшничилик, миллатлараро тотувлик ва бағрикенгликни таъминлаш борасида эришилаётган ютуқлардан яхши хабардор эканини таъкидлади.
Унинг таъкидлашича, бу саъй-ҳаракатлар Канада ҳукумати томонидан тўлиқ қўллаб-қувватланади ва икки томонлама муносабатлар кўламини кенгайтириш учун замин яратади.
Ўзбекистон ва Канада иқтисодиёти ўзаро манфаатли ҳамкорликни янада кенгайтириш учун катта салоҳиятга эга экани таъкидланди. Шу нуқтаи назардан, доимий равишда ўзаро иқтисодий ташрифлар ва савдо миссиялари алмашинувини йўлга қўйиш таклиф этилди.
Эслатиб ўтамиз, элчи Фурқат Сидиқов 2023 йил май ойи бошида Президент Жо Байденга Ўзбекистоннинг АҚШдаги элчиси лавозимига ишонч ёрлиқларини топширган эди. Шу тариқа, Ўзбекистоннинг АҚШдаги элчиси Бразилия ва Канадада ҳам Ўзбекистон шарафини ҳимоя қилади.
Фурқат Сидиқов 2017—2023 йилларда Ўзбекистоннинг АҚШдаги, шунингдек, Канада ва Бразилиядаги элчиси бўлган Жавлон Ваҳобов ўрнини эгаллади.