Ички ишлар вазирлиги Киберхавфсизлик марказининг маълум қилишича, мазкур эълонни жойлаган шахс қўлга олинган. У мактабнинг 8-синф ўқувчиси. Аниқланишича, эълонни қўйган йигит Тошкент шаҳридаги мактабларнинг бирида таҳсил олади. У эълонни ҳазил тариқасида жойлаганини, бундай жиддий тус олиб кетишини билмаганини айтди. Йигит эълонни дадасининг OLX.uz'даги профили орқали жойлаштирган.
“Мен бундай эълонни аввал бошқа шаҳар ҳақида қўйилганини кўргандим. Шу сабабли, буни Тошкентга мослаштириб, ҳазил тариқасида қўйганман. Нима иш қилиб қўйганимни тушундим. Бундан афсусдаман”, - дейди йигит.
"Биз ҳар бир қўйилган эълонни ҳаққонийлигини текшириб чиқамиз. Тошкент шаҳри сотилиши ҳақидаги эълон ҳам текширилиб, бир неча дақиқадан сўнг ўчириб ташланган", - дейди OLX.uz директори.
Йигитнинг мактабдаги ўқитувчисининг айтишича, мактабда унинг хулқ-атвори яхши, дарсларда яхши қатнашади. Ҳозирда ҳолат юзасидан ўрганиш ишлари давом эттирилмоқда.