Кеча, 24 апрель куни Silk Avia компанияси АТR 72-600 самолётида Тошкент – Самарқанд – Тошкент йўналиши бўйича ўзининг илк тарихий кўргазмали парвозини амалга оширди.
Тадбирда UzNews.uz мухбири иштирок этди. Жорий йил 25 февралдан бошлаб авиакомпания www.silk-avia.com веб-сайтида жойлашган тасдиқланган жадвалга мувофиқ мунтазам қатновларни амалга оширишни бошлайди.
"Минтақавий авиакомпания Ўзбекистонда нафақат аэропортлар тармоғини ривожлантириш, балки туризмни ривожлантириш ва ишбилармонлик фаоллигини рағбатлантириш бўйича катта механизмнинг асосий қисми ҳисобланади. Бу улкан механизмни ҳаракатланишига имкон берувчи муҳим кичик тафсилот. У ҳудудларни бир-бирига боғлаш, йўловчиларни А нуқтадан Б нуқтага ўз вақтида, тез ва арзон етказиб бериш функцияларини ўз зиммасига олади. Буни, масалан, Тошкентдан Урганчга учиб, йўлда Самарқанд ёки Бухорода тўхтаб, йўловчиларни қолдириб, олиб кетувчи ҳаво таксиси деб аташ мумкин. Биз Ўзбекистонни боғловчи авиакомпанияни яратдик, бу билан масофалар қисқаради, одамлар эса яқинроқ бўлади", — деди Uzbekistan Airports раҳбари.
Очилиш маросимидан сўнг меҳмонлар ва ОАВ вакиллари Тошкент – Самарқанд йўналиши бўйича US-131 кўргазмали рейси қўниш жойига йўл олишди.
Самарқандга етиб келган самолёт анъанага кўра сув аркаси билан, экипаж аъзолари эса гуллар билан кутиб олинди. Терминалда меҳмонларни байрам палови кутиб турарди. Меҳмондўстликдан сўнг кўргазмали рейс йўловчилари US-132 рейси билан Тошкентга жўнаб кетишди.
Эслатиб ўтамиз, жорий йил 20 апрель куни Silk Avia авиакомпания сертификатини олди ва тўрт кун давомида авиакомпания экипажларини АТR инструкторлари билан ишга тушириш учун техник парвозларни амалга оширди.
