Жаҳон ҳаво сифати бўйича World Air Quality Report ҳисоботига кўра, Ўзбекистон ҳаво ифлосланиши даражаси бўйича 143 та давлат орасида 10-ўринни эгаллади (2024 йилда — 19-ўрин).
Тошкент шаҳри эса дунёдаги 124 та пойтахт орасида 12-ўринни қайд этди.
2025 йилги ҳисоботнинг асосий хулосалари:
• Жаҳондаги шаҳарларнинг фақат 14 фоизи World Health Organization тавсия қилган PM2.5 (5 мкг/куб.м) меъёрларига мос келган. Ўтган йили бу кўрсаткич 17 фоизни ташкил этган.
• Атиги 13 та давлат ва ҳудуд ушбу меъёрларга жавоб берган: Француз Полинезияси, Пуэрто-Рико, АҚШ Виргин ороллари, Барбадос, Янги Каледония, Исландия, Бермуд ороллари, Реюньон, Андорра, Австралия, Гренада, Панама ва Эстония.
• 143 давлатдан 130 таси (91%) World Health Organization белгилган меъёрлардан ошган.
• Энг ифлосланган давлатлар қуйидагилар бўлган: Покистон (67,3 мкг/куб.м), Бангладеш (66,1), Тожикистон (57,3), Чад (53,6) ва Конго Демократик Республикаси (50,2).
• Энг ифлосланган шаҳар — Loni (Ҳиндистон) бўлиб, PM2.5 кўрсаткичи 112,5 мкг/куб.м ни ташкил этган. Бу 2024 йилга нисбатан қарийб 23% юқори ва World Health Organization меъёрларидан 22 баравардан ортиқдир.
• Энг тоза шаҳар — Niewoudtville (Жанубий Африка) бўлиб, кўрсаткич 1,0 мкг/куб.м ни ташкил этган.
• Жаҳондаги энг ифлосланган 25 та шаҳарнинг барчаси Ҳиндистон, Покистон ва Хитойда жойлашган. Шу билан бирга, Ҳиндистон биринчи тўртликдан учта ўринни эгаллаган.
• Океания энг тоза ҳудудлардан бири бўлиб қолмоқда: шаҳарларнинг 61 фоизи World Health Organization меъёрларига мос келади. Бироқ 2025 йил июнь ойида Австралиянинг Янги Жанубий Уэльс штатида кузатилган рекорд совуқлар мавсумий ифлосланиш ошишига сабаб бўлган.
Ҳисоботда қайд этилишича, ўрмон ёнғинлари ва иқлим ўзгаришларининг кучайиши туфайли жаҳонда ҳаво сифатини яхшилаш бўйича тараққиёт секинлашмоқда. Айрим ҳудудларда яхшиланиш кузатилганига қарамай, маълумотлар бўйича катта бўшлиқлар сақланиб қолмоқда — жаҳон аҳолисининг фақат кичик қисмигина ҳаво сифати ҳақида реал вақтда аниқ маълумотларга эга.
Изоҳ