Тошкент шаҳридаги Республика болалар кутубхонасини реконструкция қилиш лойиҳасини амалга ошириш бошланди. Бу ҳақда Масс-медиа фонди раиси ўринбосари Саида Мирзиёева маълум қилди.
«Республика болалар кутубхонасини реконструкция қилиш лойиҳасини амалга ошириш бошланди. Мазкур лойиҳа меценат сифатида иштирок этиб, катта ёрдам кўрсатаётган саховатли фуқароларимиз кўмаги билан амалга оширилмоқда.
Бу ғоя қалбимга жуда яқин, шунинг учун уни ҳар томонлама қўллаб-қувватладим ва уни амалга оширишда максимал даражада ёрдам беришга ҳаракат қилдим», дейди Саида Мирзиёева.
Қайд этилишича, замонавий, технологик кутубхонани яратиш билан бирга бинонинг ташқи кўриниши ҳам сақлаб қолинади.
«Архитектура ёдгорлиги бўлган ушбу бинони Тошкент аҳолиси жуда яхши кўради, шунинг учун кутубхонани асл шаклида сақлаб қолиш биз учун принципиал масала эди, биз бунга алоҳида эътибор қаратдик», деб ёзади Масс-медиа фонди раиси ўринбосари.
Мирзиёева Республика болалар кутубхонаси болалар ва уларнинг ота-оналари учун миллий ва жаҳон маданияти адабий ижодининг энг яхши намуналарини ўзлаштиришга ёрдам берувчи асосий маданият ўчоғига айланишига умид билдирган.