Бугун бошланган Сенатнинг саккизинчи ялпи мажлисида кун тартибидан ўрин олган бир қатор ташкилий масалалар, хусусан, Ўзбекистон Республикаси Олий Мажлиси Сенати Раиси ўринбосарини сайлаш тўғрисидаги масала кўриб чиқилди. Бу ҳақда Сенатнинг Ахборот хизмати хабар берди.
Маълумки, Сенат Раиси ўринбосарларидан бири Қорақалпоғистон Республикаси вакили бўлишига оид конституцион норма мавжуд. Шу боис, сенатор Мурат Каллибекович Камаловни Сенат Раиси ўринбосари лавозимига сайлаш тўғрисида президент томонидан тақдимнома киритилган.
Мурат Камалов жорий йил сентябрь ойида Қорақалпоғистон Республикаси Жўқорғи Кенгесининг депутати этиб, 2 октябрь куни Жўқорғи Кенгеснинг давлатимиз раҳбари иштирокида ўтган навбатдан ташқари саккизинчи сессиясида Жўқорғи Кенгес Раиси этиб сайланган.
Мажлисда сенаторлар томонидан М. Камалов номзоди бўйича фикр-мулоҳазалар билдирилди.
Қонун талабларига мувофиқ яширин овоз бериш орқали 72 та овоз билан сенатор Мурат Каллибекович Камалов Ўзбекистон Республикаси Олий Мажлиси Сенати Раиси ўринбосари этиб сайланган.
31 июль куни Сенати Раисининг ўринбосари Ерниязов Муса Тажетдинович 73 ёшида вафот этганди.