Самарқанд вилоятининг Жомбой туманидаги ҳозирда фаолияти тугатилган 500 ўринли Жомбой тумани енгил саноат касб-ҳунар коллежи биносида касб-ҳунар мактаби ташкил этилди. Бу йил мазкур мактабга 200 нафар ўқувчи қабул қилиниши режалаштирилмоқда.
Шунингдек, ҳокимлик томонидан коллежнинг биринчи қаватида бўш қолган хоналардан унумли фойдаланиш, “устоз-шогирд” анъанасини давом эттириш ҳамда маҳаллий ёшларни ҳунарга ўргатиш мақсадида тикувчилик цехи ташкил этилган.
Мазкур кичик ишлаб чиқариш корхонасига тикувчи қизлар жалб қилиниб, уларга камбағал ва кам даромадли оилалардан чиққан хотин-қизлар шогирд сифатида бириктирилди. Бундан кўзланган мақсад “темир дафтар”даги кам таъминланган ва эҳтиёжманд оилаларнинг фарзандларини ҳунарга ўргатиш, уларни келгусида ушбу ҳунарлари орқасидан даромадга йўналтиришдир.
Жомбой тумани ҳокимлиги мутахассиси Ҳафиза Ўсарованинг айтишича, тикув цехининг илк иши Сардоба жабрдийдалари учун йиғилган кўрпа ва кўрпачаларнинг ортиб қолган қисми пахталарини қайта ишлаб, янги кўрпачалар тикишдан бошланган. Янгиланган кўрпачалар ҳам фавқулодда ҳолатларда уй-рўзғор анжомларидан ажраб қолган ёки кам таъминланган оилаларга фойдаланиш учун берилиши режалаштирилган.
– Маҳаллий аҳолидан йиғилган хайрия маҳсулотларини Сардобага жўнатиш тўхтатилганидан сўнг, бизда кўпгина кўрпачалар қолиб кетди. Биз уларни ташлаб юбормасдан, пахтасини қайта ишлаб янги кўрпачалар тикишни лозим топдик. Бунда айни пайтда ишсиз юрган хотин-қизларимизни иш билан таъминлаш ҳам мақсад қилинган. Дастлаб тикувчилар жамоатчилик асосида жалб қилинди, кейинчалик эса туман Бандликка кўмаклашиш маркази билан биргаликда бу ерда иккита ўқув маркази ташкил қилинди, - дейди Ҳафиза Ўсарова.
.JPG)
Ҳар бир ўқув марказида 5 нафардан қиз тикувчилик сирларини ўрганмоқда. Улар маҳаллий аҳолининг буюртмалари асосида турли либослар тикиш билан биргаликда дўконларга тайёр маҳсулот – болалар кийимларини ҳам тикиб тарқатишмоқда.
– Мен 5 нафар шогирд тарбиялаяпман, - дейди Ирода опа Бердирасулова – Шогирдларим бу ерда тикувчилик сирларини ўрганиш билан бирга БҲМнинг бир баравари миқдорида стипендия ҳам оладилар. Аввалига жамоатчилик асосида ишладим, ҳозир эса бу ердаги қизларга тикувчилик сирларини ўргатаяпман ва бунинг учун менга ойлик маош ҳам тайинлашган. Ҳар куни эрталаб қизлар билан тикувчиликнинг назарий томонларини ўрганамиз сўнг амалий жараёнларни бошлаймиз.
Шунингдек, устоз ва унинг беш нафар шогирди маҳаллий аҳолидан олинган буюртмалардан тушган хизмат ҳақларини ҳам ўзлари олишади.
– Сектор раҳбарлари ишлаб чиқаришни кенгайтириб, маҳсулот сифатини оширсак ва турини кўпайтирсак, тумандаги бозорларда савдо нуқталари ташкил қилиб беришни ваъда қилишяпти. Бу эса келгусида фақат ойлик ёки стипендияга қараб қолмасдан қўшимча даромад олишимизга ҳам замин бўлар эди, - дейди Ирода опа.
Мазкур ўқув марказида кам таъминланган оила вакилларидан иборат ўқувчилар 3 ойдан 6 ойгача бўлган муддатда ҳунар ўрганишади ва курс сўнггида махсус сертификатлар берилади. Мазкур сертификатга эга бўлган тикувчига эса ўз хоҳишига қараб, кейинчалик худди шундай тикувчилик цехлари ташкил қилишга кўмаклашилади.
– Катта бўлсам, моҳир тикувчи бўламан, - дейди ўқув марказда таълим олаётган кам таъминланган оила рўйхатидаги ўзини Мадина деб таништирган 12 ёшли ўқувчи қиз. – Бир ойдан бери ўрганаяпман, яқинда онамга ҳам кўйлак тикиб бердим. Хурсанд бўлиб кийиб юрибдилар. Шу билан бирга шифокор бўлиш ниятим ҳам бор. Бунинг учун, албатта яхши ўқишим, мактаб фанларини яхши ўзлаштиришим ҳам керак.
Туман ҳокимининг ўринбосари – маҳалла ва оилани қўллаб-қувватлаш бўлими бошлиғи ушбу коллежнинг бўш турган хоналарига айни пайтда тўқувчи қизлардан иборат ҳунармандларни ҳам жалб этганини ва бу жараён ҳам “устоз-шогирд” анъанасини давом эттиришини таъкидлади.
Элбек Боймурадов
UzNews.uz мухбири